‘అఖండ 2’ బ్లాస్టింగ్ రోర్.. బాలయ్య సింహ గర్జన..!

నందమూరి బాలకృష్ణ, బోయపాటి శ్రీను కాంబినేషన్‌లో రూపొందుతున్న మూవీ ‘అఖండ 2’. అసలే బాలయ్య-బోయపాటి కాంబో, దానికి తోడు ‘అఖండ’ సీక్వెల్ అంచనాలు తారస్థాయిలో ఉన్నాయి. ఇందులో బాలయ్య డ్యూయల్ రోల్ చేస్తున్నారు. ఇప్పటికే అఘోర పాత్రకు సంబంధించిన టీజర్ విడుదలై ఆకట్టుకుంది. తాజాగా మరో పాత్రకు సంబంధించిన టీజర్ విడుదలైంది. (అఖండ 2 తాండవం)

‘అఖండ 2’ నుంచి బ్లాస్టింగ్ రోర్ పేరుతో 50 సెకన్ల నిడివి ఉన్న టీజర్‌ను విడుదల చేశారు. అదిరిపోయే యాక్షన్ సీన్ తో బాలయ్య పాత్రను రివీల్ చేశారు. ఆయన లుక్ పవర్ ఫుల్ గా ఉంది. “సౌండ్ కంట్రోల్ లో పెట్టుకో. ఏ సౌండ్ కి నవ్వుతానో, ఏ సౌండ్ కి నరుకుతానో నాకే తెలియదు. ఊహకు కూడా అందదు” అంటూ బాలకృష్ణ గర్జించినట్టుగా డైలాగ్ చెప్పడం హైలైట్ గా నిలిచింది. ఇక గుర్రాల ముందు ఆయన నిల్చున్న తీరు ఫ్యాన్స్ కి గూస్ బంప్స్ తెప్పించేలా ఉంది.

బాలకృష్ణ-బోయపాటి కాంబోపై ఉండే అంచనాలకు ఏ మాత్రం తగ్గకుండా ‘బ్లాస్టింగ్ రోర్’ టీజర్ ఉంది. బాలయ్య ఫుల్ గా నటిస్తున్న రెండు పాత్రలు ఎంతో పవర్ గా, ఒక దానిని మించి మరొకటి అన్నట్టుగా ఉండబోతున్నాయని ఈ టీజర్ తో క్లారిటీ వచ్చింది. అలాగే టీజర్ లో తమన్ బ్యాక్ గ్రౌండ్ మ్యూజిక్ కూడా మెప్పించింది.

కాగా, ‘అఖండ 2’ చిత్రం ఈ ఏడాది డిసెంబర్ 5న ప్రేక్షకుల ముందుకు రానుంది. మరి ఈ సినిమాతో బాలయ్య-బోయపాటి ఎలాంటి సంచలనాలు సృష్టిస్తారో చూడాలి.